元氣壽司-- 元氣不能少

元氣對我黎講真是不能不食，每次想食壽司都會諗起佢，今日又係元氣啦。行完街時間仲早就食埋個晚餐再行過，六點幾去到，人流唔多唔洗等位直接坐底。

炸蝦卷，蝦就係熱既就知岩岩先整啦，熱辣辣，蝦爽口彈牙。

元氣卷每次都一定要叫二碟先得，肥美的三文魚加上飯和炸得香脆的三文魚皮，無得頂呀。鰻魚壽司，鰻魚切得比較簿，如果厚少少就好啦。

軟殼蟹手卷，大大的軟殼蟹炸到卜卜脆加上沙津醬非常夾

三文魚新鮮肥美又鮮甜

唔少得既芝士蛋糕，自己最愛食係硬身的, 芝士味好濃郁。


元氣壽司
地址:  銅鑼灣羅素街8號2樓

Continue reading →

白石燒烤 -- 落雨天都可以燒烤

終於都到左BBQ的日子，一早約好同成班朋友仔一齊入白石BBQ，話說都好耐無BBQ。雖然今日的天氣不是太好，天有少少黑又有D凍，去到燒烤場仲落雨，不過好彩BBQ場是有蓋的就算落雨都可以繼續燒烤，多人的話仲可以預訂獨立房。

去到接待處就要點餐啦，有五人和十人餐，唔想叫餐都可以散叫食物。我們就叫了一個十人海鮮餐和一隻乳豬。最後職員會俾食物卷、飲品卷同燒烤爐位置號碼給我們，而食物就要等十至十五分鐘就可以去食物換處拎食物啦。拎住張卷去燒烤場搵職員就會帶我地去爐的位置同幫我地開埋個爐。

十人海鮮餐有雜丸、雞全翼、豬扒、叉燒、雞扒、芝士腸、腸仔、栗米、蓄薯、蝦和帶子。每樣的食物都係獨立包裝乾淨又衛生。帶子都算大隻，雞翼醃得夠味加埋蜜糖非常惹味，食完要再食。燒野食又點會少得我的最愛墨魚丸，彈牙爽口。芝士腸就一定要燒到外層脆皮加上蜜糖咬落口的汁都流出來。粟米和蕃薯都好甜。雞扒、豬扒和叉燒都好入味。

開始燒乳豬前最好都係望一望燒烤教學，教我地點樣燒乳豬。燒了一段時間職員會行埋黎問我地需唔需要幫我地燒，佢地會將乳豬拎去佢地大火爐到用大火燒，之後會幫我地切埋放係盒到俾我地。乳豬燒到脆卜卜，皮脆肉嫩，唔會太肥，仲可以配埋醬汁。自己燒乳豬真係第一次，好特別又可以即燒即食，夠哂熱辣辣，唔怪得咁多人都叫乳豬。

一開始都怕十人餐唔夠食，點知加埋燒豬就岩岩好啦


白石燒烤
地址: 馬鞍山馬鞍山白石第1950號

Continue reading →

The Socialhouse -- 從回舊地大坑，發現寧靜西餐廳

大坑以前讀書的時候就會成日係度食野，今日再返到大坑改變好多，多了好多餐廳。今日朋友去了一間比較有氣氛的餐廳，適合同朋友慢慢傾計食野。

 
Rose Lychee Cooler 荔枝梳打飲品，呢個我好喜歡，有荔枝的味道但又唔會過甜。

首先有鬆軟的麵包，麵包上面有細細粒的蕃茄，帶有少許的香草味。

白酒忌廉汁青口，細細隻但肉厚嫩滑味道夠濃，剩下的忌廉汁仲可以配麵包一齊食。

虎蝦天使麵，天使麵軟硬度岩岩好，虎蝦爽口彈牙，加上辣肉腸、蕃茄和橄欖油一起煮令天使麵帶有少許的甜味和微辣，最後放上芝士，味道更加惹味，胃口大開。

寧靜同舒適的環境我同朋友都不知不覺坐了兩個幾鐘。


The Socialhouse
地址: 大坑施弼街12-13號

Continue reading →

加東 -- 食物普通，但價錢較貴的新加坡菜

行完街同屋企人一齊食飯，今次去食新加坡菜就係為了食海南雞。七點左加到達餐廳的時候人流唔多，環境簡單又舒服。

首先一定要叫海南雞，我地叫了半隻，睇落份量好似好多，其實下層全部都係青瓜，份量好少。雞肉都算滑同埋沒有骨方便食。半隻雞的份量沒有見到雞脾同雞翼。而且價錢真係唔平。另外加了兩碗油飯，油飯一D都唔油，不過自己覺得唔係好夠味道。

印尼炒飯，賣相都唔錯，感覺好多野食，有蝦片，2串雞肉串同一隻太陽蛋。
第一次食印尼炒飯，味道都唔錯，唔會炒到好乾身飯帶有少許甜味

串燒半打，雞肉、豬肉串和牛肉串每樣2串。沒有燒得好乾身，食落口都好淋，但唔夠熱。沙嗲醬一D都唔辣，沒有沙嗲味

新加坡喇沙，椰汁味好重，喜歡椰汁味道的朋友一定會鐘意，但自己就真係普通啦。麵係粉線唔會煮得太淋，仲有幾隻蝦。


加東
地址: 銅鑼灣軒尼詩道525號澳門逸園中心15樓

Continue reading →

Sodam Chicken -- 人氣韓國炸雞

香港已經有好多間韓國炸雞，今次就去食芝士炸雞，芝士同炸雞都是我的最愛。早幾日就已經訂位，到餐廳不用等位就可以直入。

 太陽芝士炸雞，一碟有8件雞，農夫包盛載滿滿的芝士，熱辣辣的香脆嫩滑炸雞配上芝士真是好邪惡~~

螺肉拌冷麵，拌好之後同爽口的螺肉一齊食。一開始會覺得不是太辣，但慢慢咁食多少少辣的味道開始出來，真是食到噴火呀!喜歡食辣的朋友一定要試~

蘋果特飲，呢個飲品對我來講真是失敗

作，飲左少少只覺得好甜沒有蘋果的味道，我只飲了少少已經沒有再飲。

Sodam Chicken
地址:  銅鑼灣耀華街3號百樂中心7樓

Continue reading →

冰極餐廳 -- 冰涼餐廳

一年一度的哈佬喂又到，天氣真係好熱，玩完鬼屋又累又餓，就去冰極餐廳食個晚餐涼下冷氣又可以一邊食野一邊睇企鵝之後再繼續玩。

小食拼盤，拼盤包括有五隻蜜汁雞翼、吉列豬扒和芝士焗薯條。蜜汁雞翼大大隻。吉列豬扒炸得香脆，豬扒鬆軟。薯條上面有大量的芝士好好食。

火箭菜卡邦尼帶子意大利幼麵，二人的份量好大份，帶子大大粒，煙肉好多，卡邦尼汁適中唔會太多，意粉唔會太淋。

啖啖肉薄餅，有大量的芝士，加上燒鴨、烤雞、火腿和豬柳材料豐富。而薄餅底有少少似餅乾的口感好脆，唔會烤得太乾。

冰極餐廳

地址:  香港仔海洋公園高峰樂園冰極天地

Continue reading →

勝八鉄板串料理 -- 海鮮高質數

朋友一齊食飯，首選多數都會是日本菜。今次去位於永光中心10樓的勝八，去到的時候只是六點半所以座位仲有好多啦，過了一會兒人流開始多，不想等位的話最好都是訂位啦。環境舒服，座位比較闊好岩一班朋友仔食飯傾計

磯燒鮑魚，鮑魚大大隻有淡淡的甜味和鮮味，鮑魚彈牙

蒲燒鰻魚，鰻魚肥美，肉質鮮嫩可口，配上甜味適中的鰻魚汁一齊食好惹味

鐵板馬刀貝，一開始想了好久馬刀貝是什麼，待應話其實是蟶子。蟶子鮮美爽脆加上韭菜、香菇、芽菜一起炒令聖子更加惹味

燒明太子飯團，最愛明太子的我點可以錯過佢呢~飯團是用慢火燒所以等的時間會比較耐。飯團外層燒得香脆，中間加入大量的明太子，食落口有少許的鹹味。

巨峰梳打，巨峰提子的味道唔算好重

勝八鉄板串料理

地址:  銅鑼灣登龍街28號永光中心10樓

Continue reading →

美中.鴨子 -- 環境一流，食身普通

呢間美中鴨子平時好多人排隊食，朋友今日放假一早就去拎位，六點前去都唔會太多人等位，過咗六點之後人流就會多。環境唔錯，有的位置仲可以望海，一邊食一邊望海景同朋友傾計好唔錯。

上海小籠包，一籠有六隻，皮都適中唔會太厚，餡料足咬落口肉汁會流出來。

桂花糕凍伴鴨件，面層是脆皮鴨件夠香脆，中間是青瓜和桂花凍，底層是薯片。雖然食落口有四種口感，但一D都唔夾，自己就不是太喜歡。下次都是叫北京填鴨算了。

拌麵係最好食，少許辣的肉粒、青瓜絲和粗麵一齊拌好夾，而且粗麵爽口彈牙。

美中.鴨子
地址:  尖沙咀廣東道17號海港城港威商場3樓3319號舖

Continue reading →

牛八和牛燒肉屋 -- 座位夠闊又舒適，燒肉的選擇多

朋友生日點可以唔食餐好的，不過呢間一開始不是我地的首選而我地一早已經訂了一間餐廳，但同朋友傾傾下計講開前排在網上見到有新開的燒肉想試下，就決定轉地方，由於我地冇訂位，所以叫在銅鑼灣上班的朋友上去拎位先。去到餐廳人流不算多，可能新開的關係不用等位。餐廳的燒肉放題有四種選擇而我地就選擇了$318一位的極上放題，可以任食牛+豬+雞+海鮮。

第一時間就去沙律吧到整個沙律啦。沙律的食物款式多，可以自由配搭。

燒牛肉的時候不能燒得太耐，燒得剛剛好就可以，牛肉新鮮，有濃濃的牛肉味，而牛舌爽口。牛肉真係叫我最多，好好食。

海鮮方面魷魚，牛油栗米粒，三文魚，都會放在鍚紙盤再放上鐵網燒。牛油栗米粒好正，魷魚都算爽口。

朋友叫的豬骨溫玉湯拉麵，佢話都算唔錯，起碼麵質唔會淋

石鍋辛味牛肋肉湯，朋友話如果個湯加埋泡菜就好，最後佢自己加了泡菜

甜品方面，石鍋雪糕伴乳酪，乳酪雪糕配上雜莓醬用石鍋載住而石鍋有雪過另到雪糕溶的速度沒有咁快，再配上冷藏到冰一樣的草莓一齊食。食完一啖即刻成個人都涼哂。

窩夫伴雪糕，窩夫待應話要烤一烤先好食，記得一定要換左個新網先好烤。雪糕係柚子味，食落口好重的柚子味有少少酸配窩夫自己覺得唔係好夾

肉類的選擇都比較多，但係海鮮就真係好少，款式唔夠吸引。



牛八和牛燒肉屋
地址: 銅鑼灣霎東街33號智選假日酒店3樓B舖

Continue reading →